Psalms 106

Lohiabada ese iena bese taudia ia naria namonamo

1Lohiabada do umui hanamoa!
Lohiabada do umui tanikiu henia, badina ia be namo.
Iena lalokau bona bogahisihisi do idia noho ela bona hanaihanai.
2Daika ese Lohiabada ena siahu karadia ia herevalaia diba?
Daika ese Lohiabada do ia hanamoa haorea momokani diba?
3Mai edia laloa maoromaoro bona edia momokani taudia be namo.
Nega ibounai kara maoromaoro idia karaia taudia danu be namo.
4Lohiabada e, oiemu orea taudia do oi hanamoa neganai,
lau danu do oi laloa.
Oiemu bese taudia oi hamauria neganai,
lau danu do oi durua.
5Unai neganai lau ese,
oiemu abia hidi taudia edia noho namo do lau itaia,
bona edia moale be do lau moalelaia.
Ai be do ai moale,
badina ai be oiemu bese korikori taudia.

6Ai ese ai kara dika, aiemai tamadia idia kara dika bamona.
Ai ese ai kara kerere,
bona dika ai karaia vadaeni.
7Aiemai sene taudia be Aigupito dekenai idia noho neganai,
idia ese oiemu hoa karadia idia laloa lasi.
Oiemu lalokau nega momo oi hedinaraia, to idia laloatao lasi.
Bona idia ese Siahu Ibounai Dirava dekenai idia dagedage,
Davara Kakakaka dekenai.
8To iena gwauhamata dainai, ia ese idia ia hamauria,
iena siahu badana do ia hedinaraia totona.
9Davara Kakakaka be ia ese ia gwau henia,
vadaeni ia kaukau lao.
Ia ese dobu gabuna dekena amo iena bese ia hakaudia,
tano kaukau dekena amo do ia hakaudia hegeregerena.
10Unai kara dekena amo Dirava ese Israela taudia ia hamauria,
idia badu henidia taudia dekena amo.
Idia hadikaia ore gwauraia taudia dekena amo,
Dirava ese ia hakaudia mauri.
11Davara ese Israela idia badu henia taudia ia koua momokani,
bona idia ta ia heau mauri lasi.
12Unai neganai,
Israela taudia ese Lohiabada ena gwauhamata idia hamomokania,
bona ia hanamoa totona ane idia abia.

13To idia ese Lohiabada ena kara idia laloaboio haraga.
Iena sisiba kamonai totona idia naria lasi.
14Tano kaukau dekenai Israela taudia idia ura kava, ura kava noho,
bona unuseni idia ese Dirava idia tohoa.
15Vadaeni ia ese edia ura gauna ia henidia,
to gorere dikana ia siaia,
idia edia tauanidia ia hadikaia.

16Idia edia kamepa dekenai idia ese Mose bona Arona,
Lohiabada ena helaga taudia idia mama henia.
17Unai neganai tano ese iena uduna ia kehoa,
guri badana ia vara,
bona Datana be unai guri lalonai ia moru,
tano ese ia koua, ia mase.
Inai guri ese Abirama ena orea taudia danu ia hadonoa,
ibounai be tano ese ia koudia, idia mase.
18Lahi danu be edia orea taudia edia latanai ia diho,
bona unai tau dikadia ia gabudia ore.

19Sinai Ororo dekenai Israela taudia ese,
boromakau ena natuna ena laulauna idia karaia.
Idia ese unai golo kaivakuku dekenai idia tomadiho henia.
20Idia ese Dirava ena hairaina idia rakatania,
bona boromakau tau,
rei ia ania gauna ena laulau,
be Dirava ena gabu dekenai idia atoa.
21Idia ese Dirava,
edia hamauria Diravana,
Aigupito dekenai kara badadia ia karaia Diravana idia laloaboio.
22Ia ese Hamo ena tano dekenai hoa karadia ia karaia,
bona Davara Kakakaka ena isena dekenai,
gari bada karadia ia karaia, ani?
23Vadaeni Dirava ia gwau iena bese taudia do ia hadikaia ore,
to ia ese ia abia hidi tauna Mose,
be unai bese taudia bona Dirava edia huanai ia gini.
Mose ese Dirava ena badu ia hakerua,
ia ese iena bese taudia do ia alaia ore garina.

24Unai murinai idia ese,
Dirava ia herevalaia tano namona idia ura lasi.
Idia ese Dirava ena gwauhamata idia abidadama henia lasi.
25Edia palai rumadia dekenai idia hereva badubadu,
bona Lohiabada ena hereva idia kamonai henia lasi.
26Unai dainai ia ese sisiba metauna idia dekenai ia henia.
Ia gwau tano kaukau dekenai ia ese idia do ia hamasea,
27bona ia ese edia natudia,
be bese idauidau edia huanai do ia luludia lao,
vadaeni idau bese taudia edia tanodia dekenai do idia mase.

28Bona Peoro dekenai,
Dirava ena bese taudia ese Bala dirava idia tomadiho henia,
unai mauri lasi dirava dekenai idia henia boubou vamu idia ania.
29Inai kara dekena amo idia ese Lohiabada idia habadua,
vadaeni hanaia gorere dikana be idia dekenai ia vara.
30To Pineha ese ia toreisi,
bona kerere taudia edia dika davana ia henia,
vadaeni unai gorere dikana be Dirava ese ia hadokoa.
31Unai negana ia mai bona hari,
Pineha ena kara ai gwauraia be maoromaoro.
Bona gabeai do idia vara taunimanima danu ese,
Pineha ena kara maoromaoro do idia herevalaia noho,
ela bona nega ibounai.

32Meriba ranu gabudia dekenai,
Israela taudia ese Lohiabada idia habadua,
bona Mose ese hisihisi ia davaria idia dainai.
33Badina be idia ese Mose ena lauma idia habadua,
bona unai dainai ia ese hereva maoromaoro ia gwauraia lasi.

34Lohiabada ese Israela taudia ia oda henidia,
idau bese taudia do idia alaia mase,
to idia ese idia karaia lasi.
35Bona idia ese unai idau bese taudia danu idia headava hanai,
vadaeni unai idau bese taudia edia mauri dala dikadia,
be Israela taudia idia abia dae.
36Ma Dirava ena bese taudia ese,
unai taudia edia kaivakuku idia tomadiho henia,
bona inai kara ese Dirava ia habadua, vadaeni ia hadikadia.
37Idia ese edia natudia tau bona hahine,
be boubou gaudia totona lauma dikadia dekenai idia henia.
38Idia ese Kanana taudia edia kaivakuku dekenai boubou idia henia.
Unai bamona idia karaia neganai,
edia natudia tau bona natudia hahine idia alaia mase,
edia boubou gaudia totona.
Kerere lasi taudia edia rarana idia habubua.
Inai rara ese tano ibounai ia hadikaia.
39Inai karadia dekena amo Israela taudia be idia miro lao,
bona idia ese edia abidadama Dirava dekenai idia makohia.

40Unai dainai Lohiabada ese,
iena bese taudia ia badu henidia momokani.
Ia ese idia ia ura henia lasi.
41Ia ese bese idauidau taudia edia siahu henunai ia atodia.
Vadaeni Israela dekenai idia tuari henia taudia ese,
Israela taudia idia biagua.
42Unai idau bese taudia ese Israela taudia idia dagedage henia,
bona edia siahu henunai Israela taudia idia noho momokani,
mai guia danu.
43Nega momo Lohiabada ese,
iena bese taudia ia durua bona ia hamauria,
to idia ese ia dekenai idia kamonai henia lasi,
bona edia kara dika ese idia ia hadikaia.

44To Lohiabada ese edia taitai ia kamonai neganai,
ia ese edia hisihisi ia laloa,
45bona idia dekenai ia karaia gwauhamata taravatuna ia laloatao.
Iena bogahisihisi bada herea dainai edia dika ia gwauatao.
46Ia ese idia dagedage henidia taudia edia lalodia dekenai,
bogahisihisi kara ia havaraia,
vadaeni unai Israela taudia idia guia vadaeni taudia ese,
Israela taudia dekenai idia bogahisihisi henia.

47Lohiabada, aiemai Dirava e,
mani ai do oi hamauria.
Bese idauidau edia huanai dekena amo ai do oi haboua,
vadaeni ai ese oiemu ladana helagana do ai hanamoa,
mai tanikiu momokani danu.
48Lohiabada, Israela ena Dirava, do umui hanamoa.
Hari inai dina dekena amo ela bona hanaihanai,
taunimanima ibounai be do idia gwau,
“Amen.”
Lohiabada do umui hanamoa!